{"id":120479,"date":"2024-01-15T11:29:07","date_gmt":"2024-01-15T10:29:07","guid":{"rendered":"https:\/\/manueldelia.com\/?p=120479"},"modified":"2024-01-15T20:40:30","modified_gmt":"2024-01-15T19:40:30","slug":"il-bieb-infetah-berah","status":"publish","type":"post","link":"https:\/\/manueldelia.com\/mt\/2024\/01\/il-bieb-infetah-berah\/","title":{"rendered":"Il-bieb infeta\u0127 bera\u0127"},"content":{"rendered":"

\"\"<\/p>\n

Huwa tassew ta’ sodisfazzjon kbir g\u0127alina li t-tliet Im\u0127allfin l-aktar anzjani tal-pajji\u017c spi\u010b\u010baw biex qablu mag\u0127na u qiesu b\u0127ala bla ba\u017ci l-argumenti li kienu n\u0121iebu mill-Avukat \u0120enerali Victoria Buttigieg u mill-avukat tag\u0127ha – l-Avukat tal-Istat Chris Soler – fis-sens li l-ilment li g\u0127amlet Repubblika dwar id-de\u010bi\u017cjonijiet li kienet \u0127adet Buttigieg li l-ka\u017c tal-Pilatus Bank<\/em> kellu jinstemg\u0127a fil-mag\u0127luq.<\/p>\n

Dakinhar li l-President ta’ Repubblika Robert Aquilina beda’ jixhed u ta r-ra\u0121unijiet tieg\u0127u g\u0127ala d-de\u010bi\u017cjoni li kienet \u0127adet l-Avukat \u0120enerali li ma t\u0127arrikx lis-sidien tal-Pilatus Bank<\/em> ma kellhomx mis-sewwa, kemm l-Avukat \u0120enerali kif ukoll l-Avukat tal-Istat tg\u0127idx kemm kienu g\u0127amlu plejtu. L-inkjesta dwar il-Pilatus Bank<\/em> kienet di\u0121\u00e0 ilha tliet snin li ng\u0127alqet u kien il-makku biss li \u0121ie m\u0127arrek. Il-balieni g\u0127addewha lixxa u dan minkejja d-direzzjoni li l-pulizija kienet ing\u0127atat mill-ma\u0121istrat tal-inkjesta biex dawn ji\u0121u m\u0127arrka wkoll. Victoria Buttigieg, g\u0127al ra\u0121unijet li tafhom hi biss, idde\u010bidiet li s-sidien tal-Pilatus Bank<\/em> kellhom ig\u0127adduha lixxa.<\/p>\n

Ir-rapport ta’ inkjesta ma\u0121isterjali fit-teorija huwa dokument sigriet. Daqs kemm hi wkoll sigrieta d-de\u010bi\u017cjoni tal-Avukat \u0120enerali li ma j\u0127arrikx. Madankollu l-li\u0121i tipprovdi li de\u010bi\u017cjoni ta’ Avukat \u0120enerali li ma j\u0127arrikx tista’ ti\u0121i mg\u0127arbla mill-Qorti. U dan kien appuntu li g\u0127amlet Repubblika: talbet lill-qorti tg\u0127arbel id-de\u010bi\u017cjoni tal-Avukat \u0120enerali li ma t\u0127arrikx.<\/p>\n

G\u0127alkemm ilha tallega li Repubblika ma kellha ebda dritt li tag\u0127mel ilment dwar dan il-ka\u017c,\u00a0 s’issa Victoria Buttigieg baqg\u0127et ma xehdet qatt quddiem il-qorti. U qabel \u0121ie trattat il-mertu ta’ dan il-ka\u017c, l-Avukat \u0120enerali kienet talbet lill-qorti sabiex tidde\u010biedi dwar jekk Repubblika kellhiex dritt skont il-li\u0121i li tag\u0127mel l-ilment. X’aktarx li ttamat li twaqqaf il-kaw\u017ca qabel ti\u0121i m\u0121ieg\u0127la tixhed.<\/p>\n

Diffi\u010bli li wie\u0127ed jipprova jifhem il-g\u0127ala wa\u0127da mill-avukati l-aktar anzjani tal-pajji\u017c tidher daqshekk anzju\u017ca bil-\u0127sieb biss li ser ikollha twie\u0121eb pubblikament g\u0127all-mistoqsijiet minn fuq il-pedana tax-xhieda. Hu x’inhu, t-talbiet preliminari tag\u0127ha kif ukoll it-talba tag\u0127ha biex il-ka\u017c jinstema’ fil-mag\u0127luq \u0121ew mi\u010b\u0127uda mill-qorti.<\/p>\n

Dawn kienu \u0121abu l-isku\u017ca li \u0121aladarba s-sidien tal-Pilatus Bank<\/em> kienu \u0127arrku lil Malta quddiem tribunal tal-arbitra\u0121\u0121 internazzjonali u \u0121aladarba dan l-arbitra\u0121\u0121 jinstema’ bil-mag\u0127luq, il-kaw\u017ca f’Malta kellha tinstema’ fil-mag\u0127luq ukoll. Kienu weg\u0127du li “jippruvaw”\u00a0 i\u0121ibu prova dwar dan i\u017cda kulma kellhom il-\u0127ila li jipprodu\u010bu kienet ittra li ma kien fiha xejn minn dak li kienet allegat li kien fiha l-Avukat \u0120enerali.<\/p>\n

M’g\u0127andniex xi ng\u0127idu, l-Qorti xejn ma kienet impressjonat ru\u0127ha. L-Avukat \u0120enerali spi\u010b\u010bat biex appellat u l-Avukat tal-Istat sa\u0127ansitra talab li anki l-kaw\u017ca quddiem il-Qorti tal-Appell kellha tistema’ bil-mag\u0127luq. L-appell instema’ bil-miftu\u0127 u, skont il-Prim Im\u0127allef Mark Chetcuti u l-Im\u0127allfin Anzjani Giannino Caruana Damajo u Anthony Ellul, ma kien l-ebda ra\u0121uni l-g\u0127ala l-kaw\u017ca kellha tinstema fil-mag\u0127luq.<\/p>\n

L-Im\u0127allfin sostnew li l-\u0121ustizzja kellha tidher li qed issir u g\u0127aldaqstant huwa prin\u010bipju ewlieni li l-pro\u010beduri tal-qorti g\u0127andhom ikunu trasparenti. U huwa appuntu f’\u0121ie\u0127 it-trasparenza li l-qorti tista’ tg\u0127arbel dak li l-gvern jag\u0127mel fil-mag\u0127luq. Il-fatt li l-Avukat \u0120enerali u l-Avukat tal-Istat ma riedux li jkun hemm trasparenza u riedu jorbtu lil Repubblika biex ma tikxef xejn minn dak li taf, ma jistax \u0127lief ifisser li dawn g\u0127andhom il-fa\u0127am miblul.<\/p>\n

Din tal-lum kienet reb\u0127a importanti.<\/p>\n

Repubblika kellha lill-avukat Jason Azzopardi jidher g\u0127aliha.<\/p>\n

Araw il-konferenza stampa li g\u0127amlet Repubblika dalg\u0127odu wara li nqatg\u0127et is-sentenza.