{"id":74837,"date":"2019-05-20T16:47:46","date_gmt":"2019-05-20T14:47:46","guid":{"rendered":"https:\/\/manueldelia.com\/?p=74837"},"modified":"2019-05-21T10:36:36","modified_gmt":"2019-05-21T08:36:36","slug":"dazgur-li-hemm-ir-responsabbilta-politika-mghandniex-xi-nghidu-mhux-bi-hsiebu-jerfagha","status":"publish","type":"post","link":"https:\/\/manueldelia.com\/mt\/2019\/05\/dazgur-li-hemm-ir-responsabbilta-politika-mghandniex-xi-nghidu-mhux-bi-hsiebu-jerfagha\/","title":{"rendered":"Da\u017cgur li hemm ir-responsabbilt\u00e0 politika. M’g\u0127andniex xi ng\u0127idu, mhux bi \u0127siebu jerfag\u0127ha."},"content":{"rendered":"

\"\"<\/p>\n

Joseph Muscat issa qed jittanta jikkonvin\u010bina li bis-sa\u0127\u0127a tieg\u0127u l-pajji\u017c qed jikkonverti favur il-multikulturali\u017cmu inklussiv<\/a>. Bil-qerq kollu li jinqala’ \u0127afna g\u0127alih, Muscat qed jipprova j\u0121ieg\u0127elna niddubitaw il-memorja tag\u0127na stess g\u0127aliex li kieku kellna niftakru dak kollu li ilna nafu, konna nifhmu a\u0127jar li l-isparar bl-addo\u010b\u010b minn uffi\u010bjali tal-Istat fuq bnedmin li g\u0127andhom \u0121ilda sewda m’hi xejn \u0127lief ir-ri\u017cultat mistenni tat-t\u0127addim ta’ politika ta’ pre\u0121udizzju razzjali, ta’ diskriminazzjoni u ta’ mibg\u0127eda istituzzjonalizzata.<\/p>\n

Meta kien g\u0127adu ma sarx Prim Ministru, Joseph Muscat kien spalla ma’ spalla ma’ Lawrence Gonzi iwie\u0121eb “iva” jew “le” g\u0127all-mistoqsijiet ta’ Herman Grech tat-Times of Malta<\/em>. I\u017c-\u017cew\u0121 mexxejja kienu ntalbu jwie\u0121bu din il-mistoqsija: \u201cTaqblu mal-politika ta’ pushback<\/em> lura lejn il-Libja tal-immigranti li ji\u0121u hawn bil-ba\u0127ar ?\u201d<\/p>\n

Lawrence Gonzi kien wie\u0121eb billi qal \u2018le\u2019. Minn na\u0127a tieg\u0127u,\u00a0 Joseph Muscat wie\u0121eb \u2018iva\u2019.<\/p>\n

Ma kien hemm ebda ambigwit\u00e0 fit-twe\u0121iba tieg\u0127u.<\/p>\n

Joseph Muscat kien \u0127addan linja iebsa u razzista. Linja li kien \u0127addanha b\u0127ala parti mill-programm elettorali tal-2013.<\/p>\n

Kul\u0127add kien fehem x’ried ifisser.\u00a0Araw lill-NGOs jikkritikawh bl-a\u0127rax<\/a> u jwissu bil-perikli ta’ din il-politika. U hawn araw lil Norman Lowell ifa\u0127\u0127ar u jwieg\u0127ed kull appo\u0121\u0121 lil Joseph Muscat<\/a>.<\/p>\n

Il-Qorti Ewropea tad-Drittijiet tal-Bniedem kellha tintervjeni biex twaqqfu milli jimplimenta l-a\u0121enda tieg\u0127u<\/a>. U meta din waqqfitu, \u0127addan politika li permezz tag\u0127ha kull persuna b’karna\u0121jon iswed in\u017cammet milli titla’ l-art biex b’hekk kompla kebbes in-nirien tad-diskriminazzjoni.<\/p>\n

F’dan il-filmat, Joseph Muscat b\u0127ala Kap tal-Oppo\u017cizzjoni jidher jitkellem favur politika indifensibbli\u00a0 li tammonta\u00a0 g\u0127al tindif etniku. Ma riedx jibqa’ jara nies suwed mar-roundabouts<\/em>.<\/p>\n

\n
<\/div>\n