{"id":75525,"date":"2019-06-02T23:06:48","date_gmt":"2019-06-02T21:06:48","guid":{"rendered":"https:\/\/manueldelia.com\/?p=75525"},"modified":"2019-06-03T16:40:09","modified_gmt":"2019-06-03T14:40:09","slug":"issa-s-sabar-ta-kulhadd-intilef","status":"publish","type":"post","link":"https:\/\/manueldelia.com\/mt\/2019\/06\/issa-s-sabar-ta-kulhadd-intilef\/","title":{"rendered":"Issa s-sabar ta’ kul\u0127add intilef"},"content":{"rendered":"

\"\"<\/p>\n

Rapport fit-Times of Malta<\/em> tal-lum jitkellem dwar id-diskors \u00e0 la Fidel Castro ta’ Adrian Delia fuq ir-radju fejn \u0121ie rappurtat li qal li hu \u2014 ji\u0121ifieri Adrian Delia \u2014 \u2018wa\u0127\u0127al fl-\u201cestablishment<\/em>\u201d g\u0127at-ta\u0127wid li b\u0127alissa jinsab g\u0127addej minnu l-PN<\/a>, u wissa’ li kien g\u0127oddu tilef is-sabar. Matul diskorsu ddefenda id-de\u010bi\u017cjoni tal-Partit li jag\u0127\u017cel lil Jean Pierre Debono biex jokkupa s-si\u0121\u0121u parlamentari u stqarr li g\u0127al persuni b\u0127al Jason Azzopardi m’g\u0127adx g\u0127andu pa\u010benzja.<\/p>\n

Madankollu dal-lejl tan-Newsbook<\/em> irrappurtaw li lill-Ispeaker tal-Parlament il-Partit Nazzjonalista qallu li g\u0127alissa m’huwiex f’po\u017cizzjoni li jg\u0127idlu<\/a> min ser jie\u0127u post David Stellini.<\/p>\n

Dalg\u0127odu Adrian Delia \u0127are\u0121 b’\u0127afna arja u, malli ni\u017clet ix-xemx, il-PN sab ru\u0127u bejn il-basla u qoxritha.<\/p>\n

Jista’ Adrian Delia jg\u0127idilna e\u017cattament dalg\u0127odu g\u0127al min kien qed jirreferi li, skont hu, huma parti mill-“establishment<\/em>” u li \u0127aqqhom li jitqieg\u0127du f’posthom?<\/p>\n

Kif wasalna s’hawn?<\/p>\n

Il-Kumitat E\u017cekuttiv tal-PN iltaqa’ ftit anqas minn 24 sieg\u0127a wara li l-kummissjoni elettorali xandret ir-ri\u017cultat finali tal-elezzjonijiet tal-kunsilli lokali li \u0127allew lill-PN bl-ag\u0127ar ri\u017cultat li qatt kiseb.<\/p>\n

Il-Kumitat E\u017cekuttiv ma ltaqax biex jiddiskuti t-telfa enormi li \u0121arrab il-Partit i\u017cda ltaqa’ biex ji\u0121i de\u010bi\u017c min ser jie\u0127u post David Stellini li kien irri\u017cenja mill-Parlament g\u0127aliex, skont hu, ma kienx kuntent bil-firda li hawn fil-politika. Ir-ri\u017cenja tieg\u0127u ma tantx \u0121abet g\u0127aqda.<\/p>\n

Ittie\u0127ed vot fl-E\u017cekuttiv. I\u017cda jidher li xi \u0127add xamm li t-tellieqa kienet ser tkun wa\u0127da missielta u allura ra kif g\u0127amel biex iserra\u0127 rasu \u0127alli r-ri\u017cultat ikun favur kandidat partikolari.<\/p>\n

Mhux a\u0127jar jekk il-\u0127merijiet u d-diskors vojt jinqatg\u0127u? Qed naraw fejn tassew jinsab l-establishment.<\/em><\/p>\n

Jean Pierre Debono bag\u0127bas kollox biex jikseb ir-ri\u017cultat li xtaq.<\/p>\n

Qieg\u0127ed isem David Camilleri mal-ismijiet ta’ dawk li huma eli\u0121ibbli g\u0127all-vot. Ismu mhux suppost kien hemm g\u0127aliex – g\u0127alkemm fl-img\u0127oddi kellu vot meta kien jirrappre\u017centa wie\u0127ed mid-distrett elettorali – dan il-vot ma baqax eli\u0121ibbli g\u0127alih meta n\u0127atar te\u017corier tal-partit. L-istatut tal-PN ma jippermetti li \u0127add jokkupa aktar minn kariga wa\u0127da: g\u0127alhekk b\u0127ala te\u017corier g\u0127andu d-dritt li jkun pre\u017centi f’laqg\u0127at tal-e\u017cekuttiv i\u017cda mhux intitolat li jivvota.<\/p>\n

Huwa sejja\u0127 lil David Stellini wkoll g\u0127al laqg\u0127a u, g\u0127alkemm kellu vot b\u0127ala rappre\u017centant tal-Grupp Parlamentari li minnu kien di\u0121\u00e0 rri\u017cenja, ismu t\u0127alla fil-lista ta’ dwak eli\u0121ibbli g\u0127all-vot.<\/p>\n

Sa\u0127ansitra anki r-regoli dwar konflitti ta’ interess intramew il-ba\u0127ar. Kristy Debono, mart Jean Pierre Debono, vvutat minkejja l-fatt \u017cew\u0121ha kien wie\u0127ed mill-kontestanti.<\/p>\n

Jean Pierre Debono vvota wkoll minkejja l-fatt li l-vot kien dwaru.<\/p>\n

Id-database<\/em> dwar il-votanti eli\u0121ibbli baqg\u0127et f’idejn Jean Pierre Debono sa dakinhar tal-laqg\u0127a. Jason Azzopardi xandar dan ir-ritratt li huwa xhieda tal-fatt li Jean Pierre Debono kien qed ibag\u0127bas bil-lista ta’ votanti eli\u0121ibbli jum qabel ittie\u0127ed il-vot. M’g\u0127andniex xi ng\u0127idu, se jwie\u0121eb li dan kien xog\u0127olu.<\/p>\n