{"id":76671,"date":"2019-07-09T16:45:53","date_gmt":"2019-07-09T14:45:53","guid":{"rendered":"https:\/\/manueldelia.com\/?p=76671"},"modified":"2019-07-09T16:45:53","modified_gmt":"2019-07-09T14:45:53","slug":"strument-ta-ghaqda","status":"publish","type":"post","link":"https:\/\/manueldelia.com\/mt\/2019\/07\/strument-ta-ghaqda\/","title":{"rendered":"Strument ta’ g\u0127aqda"},"content":{"rendered":"

\"\"<\/p>\n

Il-membri tal-Kunsill \u0120eneral tal-PN\u00a0ser jitlaqqg\u0127u aktar tard dan ix-xahar sabiex jivvutaw fuq mozzjoni ta’ fidu\u010bja fil-mexxej tal-partit Adrian Delia.<\/a><\/p>\n

Il-mozzjoni, bil-mod kif tfasslet mill-mexxej innifsu, qieg\u0127da to\u0127loq konfu\u017cjoni s\u0127i\u0127a fl-im\u0127u\u0127. Jidher li Delia ma jridx li l-pro\u010bess ikun wie\u0127ed nieqes mill-ambigwit\u00e0.<\/p>\n

L-iktar messa\u0121\u0121 ovvjament kontradittorju li qed jipprova jwassal lill-Kunsilliera hu li peress li l-mexxej kien intag\u0127\u017cel mit-tesserati, il-Kunsilliera ma jistg\u0127ux jannullaw dak li kienu g\u0127a\u017clu l-istess tesserati.<\/p>\n

Dan huwa argument redikolu li ma jre\u0121ix. Il-membru parlamentari Ingli\u017c Kenneth Clarke g\u0127adu kemm wissa’ lil Boris Johnson li, kemm il-darba dan jsir prim minstru, jekk kien ser ja\u017c\u017carda jwettaq il-wieg\u0127da li g\u0127amel li jo\u0127ro\u0121 lir-Renju Unit mill-Unjoni Ewropea fil-31 ta’ Ottubru ming\u0127ajr ma jkun intla\u0127aq ftehim, huwa bi \u0127siebu jisfidah u jivvota kontra tieg\u0127u fil-Parlament. \u0126add ma xela’ li Clarke bi tradiment: g\u0127aliex b\u0127ala membru parlamentari, Kenneth Clarke huwa kontabbli lejn il-kostitwenti tieg\u0127u u mhux lejn it-tesserati tal-Partit Konservattiv li ser jele\u0121\u0121u l-mexxej il-\u0121did tag\u0127hom. U din il-funzjoni huwa fid-dmir li j\u0127addimha jg\u0127id x’ig\u0127id dak li ji\u0121i elett bis-sa\u0127\u0127a ta’ elezzjoni separata.<\/p>\n

M’hemmx dubju li sentejn ilu, Adrian Delia intag\u0127\u017cel mit-tesserati. Madankollu dan ma jfissirx li jista’ jkompli jmexxi ming\u0127ajr ma jkollu l-fidu\u010bja tal-membri tal-Kunsill \u0120enerali, tal-Grupp Parlamentari u tal-Kumitat E\u017cekuttiv. Adrian Delia ma jistax jirrombla fuq il-membri ta’ dawn l-istrutturi li lkoll huma eletti.<\/p>\n

Adrian Delia je\u0127tie\u0121 li jistaqsi lilu nnifsu l-mistoqsija li \u0121ejja: jekk il-Kunsill \u0120enerali titne\u0127\u0127ielu s-setg\u0127a li jne\u0127\u0127i l-Kap, il-Kunsillera g\u0127alxiex qeg\u0127din hemm? Dawn qeg\u0127din hemm biss g\u0127a\u010b-\u010bap\u010bip kull meta s-seduti tal-Kunsill jixxandru fuq it-televi\u017cjoni?<\/p>\n

U jekk il-Kunsill \u0120enerali ser jikkonferma l-fidu\u010bja lil Adrian Delia, dan g\u0127andu jimmira li jakkwista \u0127afna aktar minn ma\u0121\u0121oranza sempli\u010bi ta’ voti.<\/p>\n

G\u0127amlu paragun ma’ kif kienu \u0121abu ru\u0127\u0127om mexxejja pre\u010bedenti li kienu g\u0127addejin minn kri\u017ci. Fl-2012, Franco Debono kien astjena waqt vot parlamentari. Nemfasizza li kien “astjena”.<\/a> Ji\u0121ifieri Debono ma vvutax mal-Oppo\u017cizzjoni i\u017cda sfida lil Lawrence Gonzi biex jassumi r-responsabbilt\u00e0 g\u0127al \u010berti de\u010bi\u017cjonijiet li hu ma kienx qabel mag\u0127hom.<\/p>\n

Kif kien \u0121ab ru\u0127u Lawrence Gonzi dakinhar? Kien \u0121ab ru\u0127u b’mod differenti \u0127afna minn kif \u0121ab ru\u0127u Adrian Delia.<\/p>\n

Nibdew biex, ma ppermettiex lil persuni fi \u0127dan il-Partit li j\u017cebil\u0127u lil Franco Debono. Lili kienu \u010banfruni talli dak i\u017c-\u017cmien kont tal-fehma li \u0121aladarba Franco Debono kien g\u0127a\u017cel li ma jivvutax mal-Partit, seta’ jinfeta\u0127 attakk fuqu. Ming\u0127ajr ma semmejt lil Franco Debono, niftakar li fil-Facebook<\/em> kont ktibt fis-sens li dan ma kienx rappre\u017centant veru tal-kostitwenti fid-distrett tieg\u0127u. Ipparagunaw dan kollu mal-velenu li nkiteb fil-Facebook<\/em> illum. Dak i\u017c-\u017cmien il-livelli ta’ m\u0121ieba kienu \u0127afna aktar g\u0127oljin. Il-PN kien \u010banfarni apertament u kelli nibla’ kollox. Dak i\u017c-\u017cmien ma kontx \u0121urnalista i\u017cda politiku tat-tielet klassi u din i\u010b-\u010banfira kont \u0127assejtha sew.<\/a><\/p>\n

Lawrence Gonzi kien irrikorra lejn il-membri tal-Kunsill \u0120enerali: ffa\u010b\u010bja vot sigriet ta’ fidu\u010bja u nsista li kellu ji\u0121i mistieden jikkontestah kull min kien interessat li jag\u0127mel dan.<\/a> La Franco Debono u lanqas \u0127add aktar ma kkontesta lil Lawrence Gonzi i\u017cda l-membri tal-Kunsill \u0120enerali xorta ing\u0127ataw l-opportunit\u00e0 li jivvutaw b’mod sigriet dwar it-tmexxija tieg\u0127u.<\/p>\n

Lawrence Gonzi kien iffissa mira: jekk kienu ser jappo\u0121\u0121jawh inqas minn 4 minn kull 5 Kunsilliera, kien bi \u0127siebu jirri\u017cenja xorta wa\u0127da.<\/p>\n

Lill-Malta Independent on Sunday<\/em>, Louis Galea qalilha li biex partit politiku jkollu s-su\u010b\u010bessi je\u0127tie\u0121 li jkun hemm l-g\u0127aqda. Je\u0127tie\u0121 li kul\u0127add ji\u0121bed \u0127abel wie\u0127ed.<\/a> Forsi kien messu \u017cied ig\u0127id li kemm il-darba jkun hemm numru mdaqqas ta’ persuni li ma jkunux kuntenti bil-kwalit\u00e0 tal-\u0127abel li jkun g\u0127a\u017cel il-mexxej, dan g\u0127andu jdabbar rasu.<\/p>\n

F’dik il-\u0121urnata partikolari fl-2012, Lawrence Gonzi dan fehmu. Fehem li kienet ir-responsabbilt\u00e0 tieg\u0127u b\u0127ala mexxej li jkun strument ta’ g\u0127aqda u mhux ta’ firda.<\/p>\n

Araw x’kien qal Lawrence Gonzi f’g\u0127eluq id-diskors tieg\u0127u tal-2012 li fih kien talab vot sigriet. Araw ftit b’liema dinjit\u00e0, b’liema eleganza u b’liema kalma ffa\u010b\u010bja l-kri\u017ci. Fi kliem ie\u0127or, araw ftit xi tfisser tmexxija vera.<\/p>\n