{"id":99295,"date":"2021-03-17T09:39:29","date_gmt":"2021-03-17T08:39:29","guid":{"rendered":"https:\/\/manueldelia.com\/?p=99295"},"modified":"2021-03-17T12:10:25","modified_gmt":"2021-03-17T11:10:25","slug":"min-tabilhaqq-huwa-l-imghallem","status":"publish","type":"post","link":"https:\/\/manueldelia.com\/mt\/2021\/03\/min-tabilhaqq-huwa-l-imghallem\/","title":{"rendered":"Min tabil\u0127aqq huwa l-img\u0127allem?"},"content":{"rendered":"

Fil-qorti xhud tal-prosekuzzjoni xehed li ministru pre\u017centi tal-gvern kien ta l-g\u0127ajnuna tieg\u0127u lil grupp ta’ kriminali\u00a0 f’delitt. Il-biera\u0127 jien ktibt li seta’ kien qed jirreferi g\u0127as-serqa li se\u0127\u0127et fl-2010 fl-HSBC kif ukoll g\u0127all-Ministru Carmelo Abela li dak i\u017c-\u017cmien kien deputat parlamentari tal-Oppo\u017cizzjoni u manager<\/em> fl-istess bank.<\/a><\/p>\n

Kif wie\u0127ed seta’ jistenna, l-\u0121urnalisti ma \u017cammewx lura u g\u0127amlu sensiela ta’ mistoqsijiet lill-prim ministru.<\/a> \u2018Huwa minnu li ministru tal-gvern kien kompli\u010bi ma’ kriminali fit-twettiq ta’ delitt serju?\u2019 \u2018Taf min hu dan il-ministru?\u2019 \u2018X’bi \u0127siebek tag\u0127mel dwar din il-kwistjoni?\u2019<\/em><\/p>\n

Robert Abela g\u0127amel tabirru\u0127u li kien sorpri\u017c. Kien ilu jaf g\u0127al xhur s\u0127a\u0127 li din l-a\u0127bar minn \u0127in g\u0127all-ie\u0127or kienet ser tfe\u0121\u0121. X’aktarx kien jaf qabel le\u0127aq prim ministru. Je\u0127tie\u0121 niftakru li Robert Abela kien l-avukat tal-a\u0127wa tal-Maksar.<\/a><\/p>\n

Nag\u0127mlu parentesi \u017cg\u0127ira.<\/p>\n

Issa jien naf li kul\u0127add g\u0127andu d-dritt li jqabbad avukat biex jirrappre\u017centah. I\u017cda minn meta ‘l hawn sirna daqshekk insensittivi li b\u0127al donnu \u0127add ma jitwa\u0127\u0127ax meta jinteba\u0127 li dawn il-qattiela li g\u0127andhom rabtiet ma’ xibka tal-kriminalit\u00e0 mafju\u017ca f’pajji\u017ci o\u0127ra u li jimpurtaw f’Malta bombi u armi spe\u010bjali biex joqtlu lin-nies, kellhom lill-prim ministru tag\u0127na b\u0127ala l-avukat tag\u0127hom? Tistg\u0127u timma\u0121inaw x’kien ji\u0121ri li kieku storja b\u0127al din se\u0127\u0127et band’o\u0127ra? Tistg\u0127u qatt timma\u0121inaw lill-\u0120ermanja b’Kan\u010billier li kien jirrappre\u017centa qattiela fero\u010bi tal-mafja fil-qorti?<\/p>\n

Nag\u0127lqu l-parentesi.<\/p>\n

Robert Abela ji\u0121i mistoqsi x’g\u0127amel meta sar jaf li xhud – persuna li ng\u0127atat ma\u0127fra dwar il-qtil ta’ avukat – xehed fil-qorti li membru tal-kabinett tieg\u0127u kien kompli\u010bi biex twettaq delitt kriminali. Ftakru dejjem li hawn qed nit\u0127addtu dwar serqa bl-armi minn bank.<\/p>\n

Quddiem bi\u017cibilju ta’ kameras u ta’ mikrofoni Robert Abela wie\u0121eb billi ddikjara li huwa kien talab lill-Kummissarju tal-Pulizija biex jidentifika l-persuna li tkellem dwarha l-Ko\u0127\u0127u.<\/p>\n

X’fettillu wie\u0121eb b’dan il-mod?<\/p>\n

Tg\u0127id il-prim ministru ried ibellag\u0127ha li din kienet l-ewwel darba li l-Kummissarju sema’ li l-Ko\u0127\u0127u seta’ jidentifika ministru tal-kabinett f’dan il-kuntest? Jekk dan tassew huwa l-ka\u017c, allura l-prim ministru qed jammetti li l-Pulizija kienet naqset li tag\u0127mel xog\u0127olha sewwa u naqset li tivverifika l-informazzjoni li g\u0127andu l-Ko\u0127\u0127u qabel a\u010b\u010bettat li jing\u0127ata piena mnaqqsa g\u0127ad-delitt ta’ qtil u ma\u0127fra s\u0127i\u0127a g\u0127ad-delitt ie\u0127or ta’ qtil. Je\u0127tie\u0121 niftakru li l-ma\u0127fra kienet ing\u0127atat b’de\u010bi\u017cjoni tal-kabinett tal-ministri u g\u0127aldaqstant il-ministri – ewlieni fosthom Robert Abela – kienu kunfidenti li l-Pulizija kienet taf x’kienet qed tag\u0127mel qabel ma \u0121ie de\u010bi\u017c li tin\u0127are\u0121 il-ma\u0127fra.<\/p>\n

Mill-banda l-o\u0127ra, ma nag\u0127mlux mod li l-prim ministru qed jissu\u0121\u0121erixxi li, minkejja l-fatt li l-Kummissarju kien ilu jaf li l-Ko\u0127\u0127u kien semma’ l-involviment ta’ ministru tal-gvern f’delitt kriminali<\/a>, sal-biera\u0127 dan baqa’ m’g\u0127amel xejn? Jekk dan huwa l-ka\u017c, allura l-prim ministru qed jarmi l-ba\u0127ar anki l-awtonomija li suppost g\u0127andhom il-Pulizija u qed jissu\u0121\u0121erixxi li, minflok ifittxu l-verit\u00e0, l-Pulizija jippreferu jistennew li jaslu l-ordnijiet ming\u0127and il-prim ministru.<\/p>\n

Il-fatt li Robert Abela wasal pubblikament biex jo\u0127ro\u0121 ordni lil An\u0121lu Gaf\u00e0 m’hi xejn \u0127lief prova li l-prim ministru tag\u0127na jinsab liebes \u017carbun li ma ji\u0121ie\u0127x. Robert Abela m’huwiex l-img\u0127allem ta’ An\u0121lu Gaf\u00e0. Ma jistax jordnalu lil min g\u0127andu jinvestiga u lil min m’g\u0127andux jinvestiga.<\/p>\n

Mill-banda l-o\u0127ra, Robert Abela huwa<\/em> l-img\u0127allem ta’ kull “ministru pre\u017centi” u g\u0127aldaqstant mhux biss g\u0127andu kull dritt jo\u0127ro\u0121 l-ordnijiet i\u017cda huwa wkoll fid-dmir li jag\u0127ti direzzjoni lill-kabinett kollu. Lil kull ministru, l-prim ministru talbu jag\u0127mel dikjarazzjoni li l-Ko\u0127\u0127u ma kienx qed jirreferi g\u0127alih? Lil Carmelo Abela talbu jag\u0127milha din id-dikjarazzjoni? Sodisfatt bit-twe\u0121iba li ng\u0127ata?<\/p>\n

Dan kien li messu qalilna l-biera\u0127 Robert Abela: li malli sar jaf b’dak li xehed il-Ko\u0127\u0127u fil-qorti, lill-ministri – li flimkien mag\u0127hom kien idde\u010bieda li jag\u0127tih ma\u0127fra g\u0127all-qtil ta’ Carmel Chircop – talabhom jiddikjaraw li l-Ko\u0127\u0127u ma kienx qed jirreferi g\u0127al xi wie\u0127ed minnhom.<\/p>\n

Jidher li m’g\u0127amel xejn minn dan kollu. U x’aktarx naqas li jag\u0127mel dan g\u0127aliex huwa stess ma jemminx lil wie\u0127ed mill-ministri tieg\u0127u, ji\u010b\u0127ad kemm ikollu l-\u0127ila ji\u010b\u0127ad. Tabil\u0127aqq je\u017cistu xi vanta\u0121\u0121i meta jkollok prim ministru li fl-img\u0127oddi kien l-avukat tal-Ko\u0127\u0127u u tal-kompli\u010bi tieg\u0127u.<\/p>\n