![\"\"](\"https:\/\/manueldelia.com\/wp-content\/uploads\/2021\/03\/zebbug-good-friday-procession.jpg\")
<\/p>\n<\/p>\n
Il-\u0127ajja komunitarja ma tikkon\u010bernax biss id-dar u x-xog\u0127ol. Ma tikkon\u010bernax biss il-flus – anki l-flus li nonfqu biex in\u0127allsu lil dawk li jipprovdulna d-divertiment. Il-\u0127ajja fil-komunit\u00e0 tfisser im\u0121ieba u azzjonijiet li jsiru g\u0127alenija minn nies li jsarrfu biex jin\u0127oloq il-\u0121id g\u0127al kul\u0127add.<\/p>\n
Hemm u\u0127ud li jivvolontarjaw biex ig\u0127inu lil min hu fil-b\u017conn u lil dawk li fis-so\u010bjet\u00e0 jsibu ru\u0127\u0127om emar\u0121inati. O\u0127rajn ig\u0127inu lill-foqra u lil dawk li jg\u0127ixu we\u0127idhom. Hemm ukoll minn ig\u0127in lill-morda u li ji\u0121bor il-flus biex tkun tista’ tit\u0127allas il-kura medika.<\/p>\n
I\u017cda hemm ukoll min jivvolontarja \u0127inu u flusu b’ri\u017cq il-kultura u l-folklor. Issa jista’ jkun li int m’intix interessat f’dan kollu. I\u017cda wie\u0127ed ma jistax ma jinnutax id-dedikazzjoni ta’ dawk li jorganizzaw il-festi fl-ir\u0127ula, ta’ dawk li ji\u0121bru l-flus biex i\u017cejnu t-toroq, biex jinxtara’ n-nar, biex jin\u0127admu l-kostumi u biex isiru l-wirjiet b’temi kulturali u reli\u0121ju\u017ci.<\/p>\n
Hemm ukoll min jorganizza l-avvenimenti sportivi, spe\u010bjalment g\u0127at-tfal u g\u0127a\u017c-\u017cg\u0127a\u017cag\u0127. U o\u0127rajn li jiddedikaw \u0127inhom g\u0127an-nurseries<\/em> tal-basketball,<\/em> g\u0127all-boating clubs<\/em> u g\u0127all-isport tal-hockey<\/em> u tal-badminton<\/em>. Kif ukoll g\u0127a\u017c-\u017cfin.<\/p>\n U xi ng\u0127idu g\u0127al dawk li jikkontribwixxu b’\u0127inhom u bi flushom g\u0127al kaw\u017ci u g\u0127al fehmiet li jkunu jemmnu fihom b’sa\u0127\u0127a? Tista’ taqbel jew ma taqbilx, i\u017cda wie\u0127ed je\u0127tie\u0121 li jammetti li d-dedikazzjoni ta’ dawn in-nies hi ta’ benefi\u010b\u010bju wiesg\u0127a g\u0127all-komunit\u00e0. Fost dawn issib lil min jorqod fit-tined biex ikunu jistg\u0127u jwaqqfu l-qerda tal-g\u0127elieqi b’xog\u0127lijiet tat-tarmak. Lil min jiddimostra fit-toroq kontra r-razzi\u017cmu u favur l-g\u0127ajnuna lill-immigranti. Lil min jag\u0127mel kampanji s\u0127a\u0127 favur drittijiet indaqs g\u0127an-nisa jew g\u0127al dawk li huma \u017cvanta\u0121\u0121jati. Dawn il-kampanji jisru biex issir pressjoni favur tibdil fil-li\u0121ijiet biex b’hekk is-so\u010bjet\u00e0 ssir aktar \u0121usta.<\/p>\n Dan huwa l-qasam tal-volontarjat li huwa mag\u0127mul minn bnedmin li g\u0127alihom il-\u0127ajja ma tfissirx flus biss. Hawn min hu tal-fehma li, kieku dawn \u0127lew l-ener\u0121ija tag\u0127hom f’xi negozju, minflok fit-ti\u017cjin tat-toroq g\u0127all-festa tar-ra\u0127al jew minflok fl-insistenza g\u0127ad-drittijiet ta’ persuni b’\u0121ilda sewda, g\u0127andhom mnejn li llum huma finanzjarjament aktar komdi. Madankollu issib li dawn jehdew kull meta jag\u0127tu aktar milli meta jaqilg\u0127u.<\/p>\n Din hi l-\u0127ajja demokratika. Din hi l-libert\u00e0. Tfisser kultura tiela’ minn isfel g\u0127al fuq mit-toroq u mhux nie\u017cla g\u0127al isfel minn xi kummissjoni uffi\u010bjali. Tfisser fehma li hi m\u0127allsa u appo\u0121\u0121jata mill-flus ta’ dawk li jsostnuha u mhux mill-gvernijiet u mill-interessi li jfittxu li jikkontrollawha. Tfisser solidarjet\u00e0 li tmur lil hinn mid-dmirijiet ba\u017ci\u010bi ta’ \u010bittadin li j\u0127allas it-taxxa. Tfisser im\u0127abba lejn il-proxxmu, indipendentement minn jekk il-proxxmu jkunx mag\u0127ruf jew le.<\/p>\n Jidher li l-gvern din ir-realt\u00e0 ma jridx li jkompli jirrikonoxxiha.<\/p>\n Dan l-a\u0127\u0127ar il-gvern introdu\u010ba regolamenti li jxekklu u li je\u017cer\u010bitaw kontroll fuq flus li n-nies tag\u0127\u017cel li tonfoq biex tag\u0127ti l-appo\u0121\u0121 tag\u0127ha lill-komunit\u00e0 u lix-xog\u0127ol volontarju. Il-gvern irid ikun jaf lil min int qed tikkontribwixxi flusek. U jekk il-gvern ma jkollux grazzja ma’ min ikun qed jibbenefika mill-kontribuzzjoni tieg\u0127ek, irid isir jaf bi\u017c\u017cejjed biex jiskora\u0121\u0121ik milli tkompli tikkontribwixxi. U forsi anki biex jikkastigak.<\/p>\n Il-gvern g\u0127alhekk idde\u010bieda li jg\u0127abbi lill-g\u0127aqdiet volontarji b’aktar xkiel ta’ burokrazija, b’mili ta’ formoli, b’te\u0127id ta’ \u0121uramenti, b’laqg\u0127at ta’ bi nhar u bi \u017cmienijiet ta’ g\u0127eluq biex b’hekk l-g\u0127aqdiet volontarji non-governattivi jinbidlu f’a\u0121enziji kajmani tal-istat. Barra minn hekk, min jag\u0127tiha g\u0127all-volontarjat ser isibha aktar diffi\u010bli biex jiddedika \u017c-\u017cmien tieg\u0127u g\u0127ax-xog\u0127ol u ser jispi\u010b\u010ba ja\u0127li l-\u0127in tieg\u0127u f’spjegazzjonijiet lill-gvern dwar ir-ra\u0121uni g\u0127aliex g\u0127a\u017cel li jwettaq ix-xog\u0127ol volontarju.<\/p>\n Kull bidla fil-kompo\u017cizzjoni ta’ kumitat ser i\u0121\u0121ib mag\u0127ha \u0127afna mili ta’ karti. U meta jid\u0127ol xi \u0127add \u0121did f’kumitat, ikunu jridu jsiru dikjarazzjonijiet u mal-inqas \u017cball tista’ ssib lill-gvern jistenna’ biex jaqbe\u017c fuqek.<\/p>\n Biex isservi fuq kumitat ta’ klabb tal-bo\u010b\u010bi tkun trid tipprova li g\u0127andek kondotta nadifa. U \u010b-\u010bertifikati tal-kondotta ser ikunu me\u0127tie\u0121a ta’ spiss. Mhux ta’ darba.<\/p>\n L-isku\u017ca li \u0121abu hi li \u010b-\u010bertifikat tal-kondotta huwa me\u0127tie\u0121 biex tkun tista’ ti\u0121i kontrollata l-kriminalit\u00e0 finanzjarja. Sku\u017ca li hi redikola. Testijiet finanzjarji dwar accounts<\/em> u audits<\/em> li jsiru g\u0127all-g\u0127arrieda g\u0127andhom ikunu bi\u017c\u017cejjed. Jekk tg\u0127addi tal-gvern, il-qasam tal-volontarjat jista’ jinqered.<\/p>\n U jidher li dan hu dak li jrid il-gvern. Meta jitqabbad xi \u0127add b\u0127al Mario Tonna b\u0127ala “investigatur”, aktar minn inkompetenza, dan ikun ifisser soppressjoni tal-g\u0127aqdiet volontarji.<\/p>\n