Mid-dehra, lil Robert Abela tawh parir biex waqt il-kampanja elettorali ma jparlax mingħajr ma jkun ħaseb sewwa x’ser jgħid. Ħlief għal meta stqarr dwar kemm iħossu kburi u dwar kemm jinsab ottimist għall-futur tiegħu – kien qisu tifel ċkejken maħsud wara li jkun sema’ li ntagħżel biex jagħmel il-priedka tal-Milied – s’issa għamel tgħaffiġa waħda wara l-oħra.
Nhar il-Ġimgħa filgħaxija dam jirrepeti ruħu dwar il-laqgħa li kellu fi Brussell mal-mexxejja l-oħra Ewropej li matulha tkellmu dwar l-Ukrajna. Anki f’widnejn dawk is-segwaċi ħerqanin tal-Partit Laburista, Robert Abela wera li ma kellux il-ħila li jesprimi ruħu dwar dak li tassew jgħodd: jiġifieri t-tbatija li jinsabu għaddejjin minnha l-vittmi tal-aggressjoni Russa.
Waqt l-attività tal-bieraħ, Robert Abela kien aktar attent u wieġeb għal mistoqsijiet matul ritwal li formalment issejjaħ “intervista”. Teknikament, min ikun jaf minn bil-quddiem x’se jkunu l-mistoqsijiet ma jistax jitqies li qed jiġi intervistat. Iżda anki dan ma kienx biżżejjed għal Robert Abela: jeħtieġ li jkollu t-tweġibiet imħejjin bil-quddiem ukoll.
Issa għamlu paragun mal-imġiba tal-kompetitur tiegħu għall-adulazzjoni tal-partitarji tal-Partit Laburista li lbieraħ tfieħ għalkollox bis-saħħa tal-mixja “spontanja” tiegħu f’fortizza Laburista fin-nofsinhar tal-Port il-Kbir. Joseph Muscat ma jużax notamenti biex jiftakar x’għandu jgħid. Il-messaġġ tiegħu ma jitwassalx bil-kliem.
Il-messaġġ ta’ Joseph Muscat twassal permezz tal-preżenza tiegħu stess. Kulma għandu jagħmel hu li jistqarr il-kliem “jien hawn” u Robert Abela jkollu jbaxxi rasu u jsib wens temporanju fin-notamenti li jkunu kitbulu.