Kunsilliera Laburisti Mostin ivvutaw kontra mozzjoni li saret sabiex Daphne Caruana Galizia tingħata rikonoxximent fiċ-ċerimonja li ssir kull sena fil-lokalità. Il-President tal-Assoċjazzjoni tal-Kunsilli Lokali, li huwa wkoll ir-rappreżentant ta’ Malta dwar l-awtonomija lokali u d-demokratizzazzjoni, Mario Fava, xandar dan il-post li permezz tiegħu kkritika dawk il-Kunsilliera tal-Mosta li appoġġjaw l-għoti tar-rikonoxximent lil Daphne Caruana Galizia.
Il-Mosta ċertament m’għaġġlitx ħafna biex tagħti rikonoxximent lir-residenta l-aktar magħrufa li kellu.
Kienet mara magħrufa u rikonoxxuta bħala ġurnalista mill-aqwa kemm f’ħajjitha kif ukoll wara mewtha minn ġurnalisti madwar id-dinja kollha. Hi għexet ħajja fis-servizz tal-komunità permezz ta’ kitba fuq il-blog tagħha kif ukoll fil-ġurnali.
Ġiet assassinata waqt li kienet fil-qadi ta’ dmirijietha.
Wara kważi sena mill-assassinju tagħha, il-lokalità tal-Mosta tagħmel sew li tagħti rikonoxximent lill-kontribut li hi tat lid-demokrazija tagħna. Tat ukoll kontribut lill-komunità fejn għexet. Sakemm imbagħad inqatlet.
Mario Fava issa jmissu jkollu l-kuraġġ li lil tal-Kumitat tar-Reġjuni tal-Unjoni Ewropea jgħidilhom li huwa talab lill-kunsilliera tal-partit tiegħu biex jivvutaw kontra l-għoti ta’ rikonoxximent mill-kunsill tal-lokalità fejn għexet u dan għas-sagrifiċċju li għamlet.
