Bank fil-Latvja jsejjaħ ħlasijiet lil 17 Black bħala “suspettużi”

ABLV Bank, bank li jinsab għaddej minn proċeduri ta’ likwidazzjoni wara li nkixef li kien imdaħħal f’ħasil ta’ flus maħmuġin, kien informa lir-regolatur tal-Latvja li kienu saru ħlasijiet ta’ madwar $1.4 miljun lil 17 Black minn kumpannija fil-Gżejjer Seychelles ta’ negozjant taż-żejt mill-Ażerbajġan. 17 Black kienet il-kumpannija li tqabbdet biex tagħmel ħlasijiet lil kumpanniji sigrieti li Keith Schembri u Konrad Mizzi huma s-sidien tagħhom.

Din l-informazzjoni tirriżulta minn rapport f’re:baltica, ċentru Baltiku tal-ġurnaliżmu investigattiv li f’Mejju li għadda nvestiga r-rabtiet li ABLV kellu ma’ Malta. Din l-istorja għandha tinqara’ fil-kuntest tat-tweġibiet li tat il-bieraħ lill-MEP Ana Gomes l-aġenzija tal-Latvja ta’ kontra l-ħasil tal-flus maħmuġin.

Ir-rapport igħid ukoll li awtoritajiet Amerikani ta’ kontra l-ħasil tal-flus kienu saru jafu bi ħlasijiet li saru minn Mayor Trans, kumpannija reġistrata fil-Gżejjer Seychelles lil 17 Black Limited li hi reġistrata fid-Dubaj u kienu sejjħu suspettużi dawn “il-ħlasijiet, trasferimenti elettroniċi u ħasil ta’ flus”.

Sid il-Mayor Trans huwa Rufat Baratzada mill-Ażerbajġan li wkoll għandu negozji fl-Istati Uniti u ishma f’Net Element, kumpannija tal-micro-payments.

Il-website The Baltic jirrapporta wkoll li l-investigazzjoni li saret fil-Latvja għadha għaddejja. Madankollu l-website jkompli jgħid li, kif ġie konfermat mir-regolatur bankarju tal-Latvja, mill-prosekutur ġenerali u mill-ministeru tal-ġustizzja ta’ dak il-pajjiż, l-inkjesta inizjali li kienet inbdiet fi Frar li għadda mill-FIAU ta’ Malta ma nbidlitx f'”investigazzjoni kriminali attiva” u li Malta naqset li tilob għall-għajnuna legali f’dan il-każ.

Il-bieraħ l-MEP Ana Gomes kompliet tgħid li l-aġenzija tal-Latvja ta’ kontra l-ħasil tal-flus kienet għaddiet informazzjoni dwar is-sid jew is-sidien ta’ 17 Black, li jfisser li l-awtoritajiet Maltin x’aktarx ilhom jafu minn Frar l-identità tas-sidien tal-kumpannija reġistrata fid-Dubaj li kienet ftiehmet mal-kumpanniji ta’ Keith Schembri u ta’ Konrad Mizzi li tħallashom ammonti kbar ta’ flus.

Informazzjoni bħal din ma kienx faċli li tinġabar minħabba l-fatt li fid-Dubaj — kif dan l-aħħar induna l-Maġistrat Bugeja stess meta t-talbiet tiegħu għal informazzjoni dwar min hu sid jew min hi sidt l-Egrant waqgħu fuq widnejn torox – tinżamm segretezza sħiħa dwar informazzjoni marbuta mal-identifikazzjoni tas-sid jew tas-sidien ta’ kumpanniji reġistrati hemmhekk.