An oil tank reads “Fatherland, socialism or death” in Ameriven company, part of the Complex Jose in Anzoategui state, 200 miles East from Caracas, Venezuela. The complex, that make refined crude from the heavy oil of the Orinoco Belt, is a joint venture between Venezuelan state owned PDVSA and the foreign companies Chevron, British Petrolum, Total and Statoil. May 1st 2007 Venezuelan President Hugo Chavez changed the stock holding of the complex to make PDVSA ,with 60 percent of the stocks , control the participating companies.
Photographer Diego Giudice/Bloomberg News

Il-kumpannija statali Veneżwelana taż-żejt PDVSA tinsab fiċ-ċentru ta’ investigazzjoni ġdida dwar ħasil ta’ flus b’rabta ma’ Malta u mal-Veneżwela wara li l-bieraħ ġew arrestati żewġ persuni li allegatament ipparteċipaw fi skema internazzjonali li tgħodd il-biljuni tad-dollari li saret bil-għan li jinħaslu flejjes misruqin mill-kumpannija bis-saħħa ta’ skemi foloz u sofistikati ta’ investiment.

Dalgħodu The Malta Independent on Sunday xandret rapport dwar l-iskandlu. U hemm aktar f’rapport li xxandar fil-Miami Herald.

Dan il-każ allegatament beda’ f’Diċembru 2014 permezz ta’ skema ta’ kambju ta’ flejjes li saret biex jinsterqu mill-PDVSA madwar $600 miljun ġejjin mit-tixħim u mill-frodi u biex jinħasel parti mid-dħul tal-iskema. Sa Mejju 2015, il-flejjes misruqa mill-PDVSA allegatament ammontaw għal madwar $1.2 biljun – id-doppju.

Id-Dipartiment tal-Ġustizzja Amerikan qed jixli lil Matthias Krull, Ġermaniż ta’ 44 sena residenti fil-Panama u lil Gustavo Adolfo Hernandez Frieri ta’ 45, ċittadin Amerikan imwieled fil-Kolumbja.

Qed jingħad li bank Malti li għadu ma ssemmiex u kumpannija tal-investiment kienu kompliċi f’din l-istorja. Tabilħaqq id-Dipartiment tal-Ġustizzja jirrikonoxxi l-għajnuna tal-awtoritajiet Maltin fl-investigazzjoni.

PDVSA tinsab fiċ-ċentru tal-att tal-akkuża li ġie preżentat kontra Ali Sadr Hasheminejad mill-awtoritajiet federali Amerikani. 

Skond l-akkużi li saru kontra Ali Sadr, il-kumpannija li ntużat fil-pjan biex jiġu evażi s-sanzjonijiet kienet Iran International Housing Corporation jew IIHC kumpannija tal-kostruzzjoni li nħolqot f’Tehran mill-holding company Stratus Group, li s-sidien tagħha huma l-familja Sadr. Fl-2007, IIHC ffirmat kuntratt li sewa’ $476 miljun ma’ kumpannija sussidjarja tal-PDVSA sabiex jinbnew eluf ta’ djar fil-Veneżwela.

Sabiex jiġi mistur l-involviment fin-negozju tal-kumpanniji Iranjani, Ali Sadr ħoloq sensiela ta’ kumpanniji fażulli u ta’ kontijiet bankarji. U seta’ jagħmel dan għaliex inqeda’ bl-iskema tal-passaporti ta’ Henley and Partners u xtara n-nazzjonalità ta’ St Kitts and Nevis.

Ali Sadr kien wieħed mis-sidien ta’ kumpannija Svizzera li ġġib l-isem Clarity Trade and Finance u ta’ oħra Torka li ġġib l-isem Stratus International Contracting.

Skond il-prosekuturi Amerikani, minn dokumenti u e-mails tal-kumpanniji rriżulta li saru sforzi biex jinkisru s-sanzjonijiet. F’ittra li ġġib id-data tat-22 ta’ Lulju 2011, skond kif ġie rappurtat fil-Financial Times u kif jidher mill-att tal-akkuża, direttur tal-IIHC talab ħlasijiet permezz ta’ kont bankarju f’isem Clarity Trade and Finance fil-Hyposwiss Private Bank Ltd ta’ Zurich. The Irish Times irrappurtat aktar dwar dan.

Il-fergħa ta’ New York ta’ JPMorgan tissemma’ bħala l-bank inermedjarju. L-ittra hi ndirizzata lil Dulcosa, il-kumpannija sussidjarja tal-PDVSA li ssorveljat il-proġett tal-kostruzzjoni tad-djar iffinanzjat mill-gvern. Id-direttur kiteb li l-flus għandhom jitħallsu lil Clarity Trade and Finance “peress li jeżistu diffikultajiet għat-trasferiment u  ċ-ċaqlieq tagħhom”.

Għalkemm iż-żewġ każijiet jirrigwardaw ħasil ta’ flus ġejjin mill-PDVSA, dan ma jfissirx li l-Pilatus Bank u Ali Sadr għandhom xi rabta ma’ dan l-iskandlu l-ġdid li jorbot lil Malta mal-Veneżwela.

Madankollu minħabba l-fatt li, skond l-awtoritajiet Amerikani, l-awtoritajiet Maltin jafu bil-każ nistennew li r-regolaturi Maltin jinfurmaw lill-pubbliku dwar l-identità tal-bank u tal-kumpannija ta’ investiment u r-rabta li dawn għandhom ma’ dan l-iskandlu l-ġdid.